Стопанската комора на Северна Македонија ве поканува да се пријавите на обука на тема „Бизнис интегритет“, која е дел од проектот „Граѓаните против корупцијата“, финансиски поддржан од Американската агенција за меѓународен развој во Република Северна Македонија - УСАИД. Обуката има за цел да ги зајакне капацитетите на компаниите во областа на интегритетот, транспарентноста и етичкото работење, преку практични примери и алатки кои ќе помогнат да се подигне нивото на отчетност во вашето работење.

Обуките за бизнис интегритет носат значителна корист за компаниите, бидејќи интегритетот не е само прашање на етичко однесување, туку и на конкурентност на пазарот. Компаниите кои применуваат принципи на интегритет и транспарентност не само што го зајакнуваат своето внатрешно работење, туку и ја зголемуваат својата доверба кај клиентите, партнерите и инвеститорите. Воспоставувањето висок степен на деловен интегритет е од витално значење за целиот ланец на компании со кои соработувате, што придонесува за долгорочен успех и одржливост на вашето работење.

·        Вовед во бизнис интегритет: Што е интегритет и кои се придобивките за компаниите.

·        Како интегритетот влијае врз компании надвор од ЕУ.

·        Меѓународна и ЕУ регулатива: Преглед на регулативи од ОН, ОЕЦД, САД, ЕУ и стандардот ИСО 37001.

·        Основни елементи на систем за интегритет: Како да се постави систем за интегритет во компанијата.

·        Практични примери: Примена на принципите на интегритет во реални ситуации.

·        Мерки за подигање на свесноста: Како да ја зголемите свесноста за интегритет кај вработените и партнерите.

Обуката првенствено е наменета за лица кои работат на усогласеност со прописи, управување со човечки ресурси и со правни работи, како и за сите оние кои сакаат да ги унапредат своите знаења и вештини во областа на деловниот интегритет.

Јованка Кенкова Пјевац е офицер за усогласеност во Македонски Телеком АД Скопје со повеќегодишно искуство во областа на бизнис интегритет, етика и усогласеност. Таа е одговорна за дефинирање на стратегиските насоки за усогласеност, управување со ризиците од неусогласеност и имплементација на системи за спречување измами. Јованка има значајно искуство во спроведување на истраги за неправилности, развој на антикорупциски програми и учество во меѓународни проекти за зголемување на транспарентноста и одговорноста.

Елена Тримчевска Лапе е корпоративен офицер за усогласеност во Алкалоид АД Скопје со повеќе од 20 години работно искуство во правната и корпоративната област. Таа е одговорна за имплементацијата на системот за усогласеност во групацијата Алкалоид и има значајна улога во обезбедување обуки за етичко однесување и спречување на корупција. Елена има долгогодишно искуство во управување со правни проекти, ревизии и истраги, како и во креирање на стратегиски документи за усогласеност и етика.

Пријавувањето за обуката е со доставена пријава од вас на електронските адреси кои се наведени како контакт лица од Стопанската комора, најдоцна до 5 февруари (среда) 2025 година. Бројот на учесници е ограничен, па затоа ве охрабруваме да се пријавите што поскоро.

Работен јазик: македонски јазик.

За сите учесници на обуката ќе биде обезбедено:    

·        работни материјали во електронска верзија;

·        ручек и освежување

·        сертификат за учество на обуката.