На 26.03.2024 година во организација на Стопанска комора на Северна Македонија, Регионална комора со седиште во Битола, во соработка со Европската банка за обнова и развој (ЕБОР), Програмата за развој на Обединетите нации (УНДП), Меѓународната организација за миграција (ИОМ) и Економската комисија за Европа на Обединетите нации (УНЕЦЕ) во склоп на активностите на проектот „Зелен финансиски инструмент“ е реализирана презентација за ГФФ – зелениот финасиски иструмент достапен за бизнис секторот во Македонија.
Овој финансиски инструмент со вкупна вкупна вредност од 46 милиони американски долари кој ќе се спроведува до април 2026-та година треба значително да ја подобри понудата и пристапот до поволно финансирање за мали и средни претпријатија (МСП) и недоволно опслужени но кредитоспособни целни групи на лица/домаќинства за инвестиции во решенија за обновлива енергија (ОЕ) и енергетска ефикасност (ЕЕ).
Зелениот финансиски инструмент е кредитна линија наменета за финансирање инвестиции во енергетско ефикасна опрема и обновливи извори на енергија со високи перформанси преку локални партнерски банки и лизинг компании. Со овој финансиски инструмент освен што се поддржуваат малите и средните претпријатија во Македонија во финансирањето на “зелени” инвестиции, се влијае и на намалувањето на емисиите на стакленички гасови и намалувањето на загадувањето на воздухот во земјата.
Инструментот е комбинација на финансирање на проектни инвестиции преку заеми и лизинг со технички совети и услуги креирани за малите и средни претпријатија за да имплементираат и имаат корист од технологиите за зелена енергија со високи перформанси.
По успешната верификација на инвестициските проекти преку GFF, малите и средните претпријатија имаат право на стимулација за враќање на средства за успешно завршена инвестиција во износ од 5-10% од главницата на кредитот и 30% за лицата/домаќинствата.
Проектот „Зелен финансиски инструмент“ е финаниски поддржан со грант од Заедничкиот фонд за целите на одржливиот развој и Владата на Република Северна Македонија и кредитно финансирање од Европската банка за обнова и развој и комерцијалните банки.
М-р Никола Димковски
