Со еден збор, тоа навистина го опишува Крис. Човекот кој го сретнав во далечната 2013 во процесот на привлекување на КОСТАЛ во Македонија. Првата средба во Македонија ни беше пред струшкото село Мислешево на локацијата каде веќе беа исцртани контурите на ТИРЗ Струга. Иако планот беше да го чекам на аеродромот во Скопје за да ја започнеме турнејата низ државата барајќи соодветни браунфилд локации, мојот лет каснеше и беше пренасочен кон аеродромот во Тирана. Бев многу нервозен знаејќи дека првиот впечаток и импресија при вакви средба имаат огромна, па дури и пресудна улога, но Крис беше многу сталожен и со целосно разбирање за ситуацијата. При таа посета поминавме три дена барајќи локации низ Македонија, а потоа следеа многу средби во Германија, Англија, Ирска, и пак во Македонија. Систематски бевме анализирани и споредувани со многу други земји во регионот- според безброј параметри, и иако преговорите не беа секогаш лесни, уште од првиот личен контакт и подоцна истата вечер јадејќи локален специјалитет покрај Охридското езеро, имав чувство дека инвестицијата ќе биде “наша”. Тоа конечно и се случи на неколку дена пред католички Божик 2015 година кога добивме писмо со конфирмација дека Македонија и Охрид се избрани како нова инвестициска локација за КОСТАЛ.