Јадранка Аризанковска, советник за ЕУ интеграции во кабинетот на претседателот на СКСМ нагласи дека Комората како претставник на бизнис секторот со особен интерес ги следи досегашните процеси на преговорите и ќе биде вклучена и во целиот процес на преговори кој ќе следи.

„Како Комора, врз база на барањето на ЕК, за креирање на дополнителни мерки и фондови за земјите од западен балкан, доставивме преку Секретаријатот за европски прашања и Коморскиот инвестициски форум барања до Европската комисија и ДГ НЕАР, барања за реализирање на одредени суштински предуслуви за да може да се олесни но и финасиски поддржи процесот на прилагодување на македонските компании. Во тек е скрининг процесот кој е исто толку важен како и целиот тек на преговори бидејќи во рамки на претставувањето на државните институции што е досега сработено се дефинираат и рокови за она што треба да следи и да се реализира. Процесот на интеграција подразбира усогласување на економските системи, политики и регулативи со оние од Европската унија. Во рамки на тоа усогласување, од шестте кластери дефинирани во преговарачката рамка пет се однесуваат на бизнисот и директна имлементација од страна на компаниите“, потенцираше Аризанковска.

Стопанската комора со свои стручни анализи и мислења во рамки на преговорите со ЕУ ќе се обиде да издејствува пролонгирање или да им се даде соодветно време за имплементација на одредени барања од регулативите за компаниите.

Ирена Мојсовска, експерт во Центарот за проекти во Комората, зборуваше за важноста на проектот Европска мрежа на претприемачи, што го реализираКомората, а е финансиран од Европската комисија. Станува збор за најголема бизнис мрежа во светот која делува во земјите на Европската Унија и пошироко, во повеќе од 60 земји со кои соработува Европската Унија, со учество на повеќе од 600 локални партнерски организации како универзитети, стопански комори, агенции, фондации и здруженија, кои обезбедуваат информации и советувања за компаниите од областа на бизнисот, технологијата или науката.

„Главната мисија на Enterprise Europe Network/ Европска мрежа на претприемачи е да им помогне на малите и средни компании да ги искористат различните бизнис можности кои се во рамките на единствениот ЕУ пазар со давање информации и поддршка, особено со прашања поврзани за ЕУ регулативата и прописите, информации и совети за Европските стандарди или во насока на промовирање на технологија, иновативен производ, услуги или техничка експертиза. Сите овие информации исто така може да се користат и од страна на поголемите компании, институти за истражување, универзитети, центри за технологии и агенции за развој на иновации. Овие услуги се бесплатни во рамките на бизнис мрежа“, истакна Мојсовска.

Пристапот до финансиските средства за ММСП е еден од клучните фактори кои ги наведуваат компаниите во Македонија и Западен Балкан како пречка за зголемен обем на економски активности и нивен раст и развој. Пристапот до финансии е клучен за добивање на обртен или долгорочен капитал за да ги одржат производствените процеси и остваруваат раст и развој, како и за инвестиции, иновации, креирање на работни места и имплементација на напредни техники и технологии.

„За да се поттикне развојот на приватниот сектор, финансиската поддршка од Европската Унија е насочена кон поддршка на микро, малите и средни претпријатија кон нивно усогласување со нормите и стандардите во ЕУ во областа на енергетска, транспортна и дигитална конетивност, одржливо земјоделие, биодиверзитет, шуми и вода, одржливи градови, човечки развој итн“, истакна Антонета Манова Ставреска.