Во просториите на Стопанската комора се одржа прес-конференција посветена на засилената регионална деловна динамика и претстојните клучни настани во рамките на црногорското претседателство со Берлинскиот процес. Во името на Комората, обраќањето го одржа Даниел Матракоски, координатор за меѓународна соработка, кој ги претстави стратешките иницијативи и приоритети на коморската заедница за поддршка на домашното стопанство.
Како што истакна Матракоски, фокусот на Комората останува насочен кон три фундаментални столба: постојана поддршка за раст и промоција на извозот, образование и стручно оспособување усогласено со реалните потреби преку дуалниот систем, како и продлабочување на регионалната соработка за создавање предвидлив деловен простор.
Посебен акцент во овие напори има ангажманот на претседателот на Стопанската комора, Бранко Азески, кој во моментов ја извршува функцијата претседател на Коморскиот инвестициски форум на Западен Балкан (WB6 CIF) — заедничка институционална платформа што застапува повеќе од 350.000 компании. Матракоски најави дека на претстојниот Состанок на министрите за економија од регионот, закажан за 30 септември во Цетиње под покровителство на црногорскиот заменик-премиер Ник Ѓељошај, претседателот Азески ќе биде „единствениот претставник на бизнис-заедницата од целиот Западен Балкан кој ќе се обрати на оваа меѓувладина средба“. Тоа претставува исклучителна можност барањата на приватниот сектор директно да бидат соочени со ресорните министри и високите претставници на Европската комисија.
По меѓувладината средба, во Будва ќе се одржи и состанокот на Бизнис-платформата ЕУ–Западен Балкан. На оваа платформа на КИФ отворено ќе се дебатира за спроведувањето на Планот за раст и Заедничкиот регионален пазар, со цел проширување на зелените коридори, заемно признавање на фитосанитарната документација и итно отстранување на нецаринските бариери.
Осврнувајќи се на економските параметри, Матракоски посочи дека иако трговската размена со ЕУ надмина над 88 милијарди евра, регионот бележи трговски дефицит од 14 милијарди евра. Воедно, индустријата се соочува со дефицит од 190.000 работници, а постои потенцијал од 2,8 милиони економски неактивни граѓани. За надминување на овие предизвици, Матракоски презентираше пет развојни иницијативи на КИФ:
1. Крај на нелојалната трка за странски инвестиции: Усогласување на инвестициските стимулации наместо меѓусебно наддавање со субвенции за исти инвеститори.
2. Вклучување на домашните фирми како главни снабдувачи: Техничка сертификација на локалните компании за поголема домашна додадена вредност.
3. Поттик за меѓусебни инвестиции: Воспоставување систем за следење на регионалните инвестиции кои сега се под 5%.
4. Обука и вработување на домашните кадри наместо недостиг на работна сила: Наменско искористување на Регионалниот фонд за предизвици за активирање на домашниот потенцијал.
5. Директна и брза врска со Брисел: Постојан оперативен дијалог со Европската комисија за експресно отстранување на бирократските кочници.
„Берлинскиот процес ја постави рамката, но следниот чекор за стопанството е практичното економско поврзување. Целта е процесот на интеграција да донесе реална економска конвергенција, а не само формално институционално усогласување,“ истакна Матракоски.
Прогресив Академија