Врз основа на членот 75 ставови 1 и 2 од Уставот на Република Северна Македонија, претседателот на Република Северна Македонија и претседателот на Собранието на Република Северна Македонија издаваат

Се прогласува Законот за гаранција на Република Северна Македонија на обврските по Договорот за заем за дополнително финансирање на проектот за надградба и развој на патишта, кој ќе се склучи меѓу Меѓународната банка за обнова и развој – Светска банка и Јавното претпријатие за државни патишта, што Собранието на Република Северна Македонија го донесе на седницата одржана на 28 март 2024 година.

Бр. 08-2167/1

28 март 2024 година

Скопје

Претседател на Република

Северна Македонија,

Стево Пендаровски, с.р.

 

Претседател

на Собранието на Република

Северна Македонија,

Јован Митрески, с.р.

 

Република Северна Македонија го гарантира намирувањето на обврските и исполнувањето на одредбите од Договорот за заем за дополнително финансирање на Проектот за надградба и развој на патишта, кој ќе се склучи меѓу Меѓународната банка за обнова и развој - Светска банка и Јавното претпријатие за државни патишта во износ од 31.000.000 евра, доколку Јавното претпријатие за државни патишта не ги исполнува и сервисира обврските од Договорот за заем.

Условите и начинот на користење на заемот од членот 1 од овој закон се утврдуваат со Договорот за заем од членот 1 од овој закон, кој ќе се склучи меѓу Меѓународната банка за обнова и развој - Светска банка и Јавното претпријатие за државни патишта за дополнително финансирање на Проектот за надградба и развој на патишта.

Сите обврски кои произлегуваат од Договорот за заем од членот 1 од овој закон, како и сервисирањето на заемот, ќе ги врши Јавното претпријатие за државни патишта од приходите кои ги остварува, во рокови и услови утврдени во Договорот за заем од членот 1 од овој закон.

Рокот за отплата на заемот од членот 1 од овој закон е 16 години, со вклучен грејс- период од три години.

Каматната стапка е шестмесечен ЕУРИБОР со варијабилен распон.

Јавното претпријатие за државни патишта ќе ѝ плати на Меѓународната банка за обнова и развој - Светска банка еднократна провизија во износ од 0,25 % од сопствени средства.

Јавното претпријатие за државни патишта ќе ѝ плаќа на Меѓународната банка за обнова и развој - Светска банка провизија во висина од 0,25% од неповлечениот дел од заемот, на годишно ниво.

За регулирање на меѓусебните права и обврски кои произлегуваат од Договорот за заем од членот 1 од овој закон и од Договорот за гаранција, Министерството за финансии и Јавното претпријатие за државни патишта ќе склучат посебен договор.

Прометот на добра и услуги извршен кон Јавното претпријатие за државни патишта наменети за реализација на Проектот за надградба и развој на патишта, финансиран со Договорот за заем од членот 1 од овој закон е ослободен од данок на додадена вредност, со право на одбивка на претходниот данок.

Увозот на добра/стоки извршен од страна на Јавното претпријатие за државни патишта наменети за реализација на Проектот за надградба и развој на патишта, финансиран со Договорот за заем од членот 1 од овој закон е ослободен од данок на додадена вредност, увозни давачки и акциза на енергенти и данок на моторни возила за времетраењето на Проектот.

За прометот кој е извршен кон Јавното претпријатие за државни патишта наменет за реализација на Проектот за надградба и развој на патишта, финансиран со Договорот за заем од членот 1 од овој закон, за кој истиот е даночен должник согласно со членот 32 точка 4 и членот 32-а од Законот за данокот на додадена вредност е ослободен од обврската да пресмета и да плати данок на додадена вредност.

Даночниот обврзник кој врши промет за кој e ослободен од данок на додадена вредност согласно со ставовите 1 и 3 на овој член, задолжително, освен име (назив) на примателот на доброто или корисникот на услугата, во фактурата го наведува и називот на проектот и називот на Договорот за заем од членот 1 од овој закон.

Јавното претпријатие за државни патишта при увоз на добра/стоки ослободени согласно со ставот 2 на овој член, на надлежниот царински орган задолжително му доставува копија од Договорот за заем од членот 1 од овој закон и изјава дека увезените добра/стоки се наменети за реализација на Проектот за надградба и развој на патишта, финансиран со Договорот за заем од членот 1 од овој закон.

Прометот на добра и услуги од ставовите 1 и 3 на овој член, како и увозот на добра/стоки од ставот 2 на овој член, не може да го надмине износот од договорот меѓу Јавното претпријатие за државни патишта и избраниот изведувач за вршење на договорните работи наменети за реализација на дополнителното финансирање на Проектот за надградба и развој на патишта, финансиран со Договорот за заем од членот 1 од овој закон.

Добрата/стоките кои биле ослободени од плаќање увозни давачки врз основа на членот 6 став 2 од овој закон, во рок од три години од денот на увозот не смеат да се отуѓат, да се дадат на користење на друг, да се позајмат или поинаку да се употребат за други цели, а не за оние за кои биле ослободени од плаќање увозни давачки, пред да бидат платени увозните давачки. Таквите предмети не смеат да се дадат во залог, да се изнајмат или да се дадат како осигурување за други обврски.

Доколку имателот на правото, пред истекот на рокот од ставот 1 на овој член, добрата/стоките кои билe ослободени од плаќање увозни давачки врз основа на членот 6 став 2 од овој закон има намера да ги употреби за други цели, а не за оние за кои билe ослободени од плаќање увозни давачки, поднесува барање за плаќање царински долг до царинскиот орган.

Висината на царинскиот долг од ставот 2 на овој член царинскиот орган го пресметува врз основа на елементите за утврдување давачки што важеле во моментот на поднесување на барањето за плаќање царински долг.

Во случај на непридржување на одредбите од ставовите 1 и 2 на овој член, висината на царинскиот долг се пресметува врз основа на елементите за утврдување давачки во моментот на прифаќање на царинската декларација, врз основа на која стоката била ослободена од плаќање увозни давачки.

Овој закон влегува во сила со денот на објавувањето во „Службен весник на Република Северна Македонија“.