Врз основа на член 65 став (6) од Законот за високото образование* („Службен весник на Република Македонија“ бр.82/18 и „Службен весник на Република Северна Македонија“ бр.178/21 и 58/24), Владата на Република Северна Македонија, на седницата, одржана на 16 април 2024 година, донесе
ОДЛУКА ЗА ДАВАЊЕ НА ОДОБРЕНИЕ ЗА ОСНОВАЊЕ НА ФАРМАЦЕВТСКИ
ФАКУЛТЕТ ПРИ МЕЃУНАРОДЕН БАЛКАНСКИ УНИВЕРЗИТЕТ ВО СКОПЈЕ
Член 1
Со оваа одлука се дава одобрение за основање на Фармацевтски факултет при Меѓународен балкански универзитет во Скопје, на ул. „Македонско-Косовска бригада“ бб. во Скопје.
Член 2
Одобрението од член 1 од оваа одлука, се дава врз основа на поднесеното Барање од основачот Меѓународен балкански универзитет во Скопје, со ЕДБС 6426875, со седиште во Скопје на ул. „Македонско-Косовска бригада“ бб. во Скопје.
Член 3
На Фармацевтскиот факултет од член 1 од оваа одлука, се врши високообразовна дејност согласно Законот за високото образование*.
Член 4
На Фармацевтскиот факултет од член 1 од оваа одлука, ќе се изведува интегрирана студиска програма од прв и втор циклус на студии по фармација со времетраење на студиите од 5 години (10 семестри), односно вкупно (300 ЕКТС).
Член 5
Потребниот наставен кадар кој ќе изведува настава на Фармацевтскиот факултет од член 1 од оваа одлука, ќе биде согласно стандардите и нормативите за вршење на високообразовна дејност.
Член 6
Потребната опрема за опремување и простор на Фармацевтскиот факултет од член 1 од оваа одлука, ќе биде согласно стандардите и нормативите за вршење на високообразовна дејност.
Член 7
Фармацевтскиот факултет од член 1 од оваа одлука, ќе биде сместен во објектот на Меѓународен балкански универзитет во Скопје на ул. „Македонско-Косовска бригада“ бб. во Скопје, со вкупна површина за вршење на научно-истражувачка и високообразовна дејност од 1425 м².
Член 8
Бројот на студенти кои се запишуваат на Фармацевтскиот факултет од член 1 од оваа одлука, ќе биде определен со решението за акредитација на високобразовната установа.
Член 9
Наставата на Фармацевтскиот факултет од член 1 од оваа одлука, е на македонски јазик и неговото кирилско писмо и англиски јазик и неговото писмо, согласно Законот за високото образование*.
Член 10
Фармацевтскиот факултет од член 1 од оваа одлука, ќе отпочне со работа по добивањето на решението за почеток со работа од министерот за образование и наука и уписот во регистарот на високообразовни установи и во Централниот регистар на Република Северна Македонија.
Член 11
Средствата за основање и работа на Фармацевтскиот факултет од член 1 од оваа одлука, ги обезбедува основачот.
Член 12
Оваа одлука влегува во сила наредниот ден од денот на објавувањето во „Службен весник на Република Северна Македонија“.
Бр. 41-4181/3
16 април 2024 година
Скопје
Претседател на Владата
на Република Северна Македонија,
м-р Талат Џафери/Talat Xhaferi, с.р.
